No noso departamento de Informática seguimos apostando por unha formación práctica e conectada coa realidade laboral. Froito desta filosofía nace ORZALAN, unha aplicación desenvolvida no propio centro para apoiar o traballo nos módulos de Redes Locais e noutros módulos da familia profesional.
ORZALAN é unha aplicación de escritorio creada en Python (PySide6 + SQLite) que ofrece as seguintes características:
- Xestión dun catálogo de materiais (cableado, racks, electrónica, servizos, etc.).
- Creación e edición de orzamentos profesionais.
- Cálculo automático de custos, marxes e prezos de venda.
- Exportación de documentos en PDF e XLSX.
- Funcionamento portable sen necesidade de servidor.
- Adaptación ao uso específico en aula.
No módulo de Redes Locais, a ferramenta permite completar todo o proceso dunha instalación: análise de necesidades, deseño técnico, cálculo de materiais e xeración do orzamento final. O alumnado non só aprende a instalar e configurar redes, senón tamén a presentar unha proposta técnica e económica coherente.
ORZALAN pode empregarse nos seguintes módulos e ámbitos:
- Redes Locais: planificación de instalacións, cálculo de materiais e elaboración de orzamentos completos.
- Montaxe e Mantemento de Equipos: presupostos de PCs completos, ampliacións, reparacións e servizos técnicos.
- Administración de Sistemas: dimensionamento de servidores, racks e electrónica profesional, análise de viabilidade económica.
- FP Básica e módulos transversais: uso como software básico de xestión de orzamentos, traballando competencias dixitais, organizativas e económicas.
O proxecto está dispoñible en GitHub no repositorio https://github.com/javier-feijoo/orzalan e as versións compiladas poden descargarse en https://github.com/javier-feijoo/orzalan/releases.
Con ORZALAN damos un paso máis cara a unha Formación Profesional máis realista, práctica e adaptada ás necesidades do sector tecnolóxico.
